Abahagarariye AFC/M23 Basubiye muri Qatar mu Biganiro by’Amahoro na Leta ya RDC
Abahagarariye ihuriro rya politiki n’igisirikare AFC/M23 bamaze gusubira muri Qatar mu rwego rwo gukomeza ibiganiro by’amahoro na Leta ya Repubulika Iharanira Demokarasi ya Congo (RDC), nyuma y’igihe kirenga ukwezi ibiganiro bitangiye ariko bigenda buhoro.
Umunyamabanga Uhoraho wa AFC/M23, Benjamin Mbonimpa, yayoboye itsinda ryageze i Doha mu mpera z’icyumweru gishize, aho bahurira n’intumwa za Leta ya RDC zari zimaze iminsi ibiri zihageze.
Ibi biganiro bisubukuwe nyuma y’uko impande zombi ziheruka guhura ku wa 23 Mata 2025, ubwo zasinyaga amasezerano yo guhagarika imirwano, ku bufasha bwa Leta ya Qatar iri no mu nshingano zo guhuzabitekerezo hagati y’impande zitavuga rumwe.
Nubwo hamenyekanye ko impande zombi zahuye ku wa 4 Gicurasi, kugeza ubu ntabwo harasobanurwa neza ingingo nyamukuru zaganiriweho. Gusa amakuru yizewe aturuka ku bari hafi y’ibiganiro yemeza ko icyizere cyo kugera ku mwanzuro urambye cyongeye kuzamuka, cyane cyane nyuma yo kwemera guhura imbonankubone.
AFC/M23 na Leta ya RDC bagiye muri Qatar kuva muri Werurwe 2025, ariko kugeza ubwo bari baganira binyuze kuri Leta ya Qatar nk’umuhuza. Iyi nzira y’ubuhuza bw’umuturanyi igamije kwirinda kongera imvururu mu karere, cyane cyane mu gihe intambara ikomeje kwambika ubusa intara za Kivu y’Amajyaruguru na Kivu y’Amajyepfo.
Leta ya RDC yari yaratangaje ko itazigera iganira n’umutwe wa AFC/M23, ariko yahinduye umuvuno nyuma y’uko uyu mutwe wafashe imijyi ya Goma (mu mpera za Mutarama) na Bukavu (muri Gashyantare), ibintu byagaragaje imbaraga zawo mu kibuga.
Ibiganiro biri kubera i Doha bigomba kugendera ku mabwiriza n’amahame yemeranyijweho n’abakuru b’ibihugu bo mu Muryango wa Afurika y’Iburasirazuba (EAC) ndetse n’uwa Afurika y’Amajyepfo (SADC), nyuma y’inama yabereye i Dar es Salaam muri Gashyantare 2025.
Icyakora, uko ibiganiro bikomeza, haravugwa impungenge z’uko ihuriro ry’imitwe ya Wazalendo rifatanyije na Leta ya RDC, rishobora kuba rifite umugambi wo gutiza umurindi imirwano no kuyobya umurongo w’amahoro uri gucengerwa.
Muri iki gihe, amahanga akomeje gukurikiranira hafi iby’ibi biganiro, dore ko intambara yo mu Burasirazuba bwa Congo imaze kugira ingaruka ndende ku mutekano w’akarere no ku mibereho y’abaturage batagira kivurira.
