Ingabire Victoire: agiye gukorwaho iperereza 

Kugira ngo areganwe n’abashinjwa gushaka guhirika ubutegetsi,Victoire Ingabire, umunyapolitike utavuga rumwe n’ubutegetsi mu Rwanda, yabwiye urukiko ko benshi mu baregwa gushaka guhirika ubutegetsi badakoresheje intambara abazi ariko ko we, cyangwa ishyaka rye, atigeze ategura amahugurwa yo gukora icyo gikorwa bashinjwa.

Urukiko rwavuze ko amakuru Ingabire yatanze adahagije, niko gutegeka ko akorwaho iperereza kuko rubona hari ibimenyetso bimushinja.

Ku wa kabiri w’iki cyumweru ni bwo Urukiko Rukuru rwategetse Victoire Ingabire kwitaba akabazwa mu rubanza rw’abantu icyenda barimo umunyamakuru Théoneste Nsengimana n’uwitwa Sylvain Sibomana bavuga ko yari abayoboye, bafunze kuva mu 2021.

Mu gushinja abaregwa, ubushinjacyaha bwagiye bugaruka kuri Ingabire, buvuga ko yagize uruhare runini mu gutegura ayo mahugurwa, ari na yo ntandaro yo kumutumiza mu rukiko uyu munsi.

Mbere yo kugira icyo avuga, umucamanza , yabanje kubwira Ingabire ngo yiyumve nk’umuntu “ugiye gutanga amakuru asabwa n’urukiko” ngo ntiyiyumve nk’umuntu uregwa urimo kwisobanura.