Rayon Sports mu gihombo gikomeye nyuma yo gusezerera Robertinho binyuranyije n’amategeko
Ikipe ya Rayon Sports FC yongeye kwisanga mu bibazo bikomeye nyuma y’uko Ishyirahamwe ry’Umupira w’Amaguru ku Isi (FIFA) riyitegetse kwishyura amafaranga asaga miliyoni 30 Frw umutoza wayo wahoze ayiyobora, Roberto Oliveira Gonçalves do Carmo uzwi nka Robertinho.
Iki cyemezo cyafashwe nyuma y’aho uyu mutoza ukomoka muri Brésil yandikiye FIFA ayiregera, asaba kurenganurwa ku mpamvu z’uko Rayon Sports yamwirukanye mu buryo bunyuranyije n’amategeko mu kwezi kwa Mata 2025. I
cyo gihe iyi kipe yitwaje ko afite ibibazo by’uburwayi bikaba intandaro yo kumuhagarika, nyamara we akemeza ko ibyo ari urwitwazo rwo kumwirukana nta mpamvu zumvikana.
Mu ibaruwa FIFA yohereje impande zombi ku wa 12 Kanama 2025, yamenyesheje ko Rayon Sports igomba kwishyura Robertinho amadolari ya Amerika 22,500, angana n’amezi 6 y’imishahara ye atigeze ahabwa (yahembwaga $5,000 ku kwezi). FIFA ikaba yahaye Rayon Sports iminsi 45 gusa ngo ibe yamaze kwishyura, bitaba ibyo igahanirwa kutubahiriza icyemezo cyayo.
Umwe mu banyamategeko bakurikiranira hafi ibibazo by’amakipe yo mu Rwanda yagize ati: “Iki ni ikibazo cyongeye kugaragaza intege nke z’amakipe yacu mu byerekeye imyubakire n’imicungire y’abakozi. Iyo Rayon Sports itubahiriza iki cyemezo, izahanishwa ibihano bikomeye, birimo kutemererwa kwandikisha abakinnyi bashya mu gihe cy’isoko ry’igura n’igurisha inshuro eshatu zikurikiranya.”
Robertinho, wakunzwe cyane n’abafana ba Rayon Sports ubwo yayitozaga, yamaze kubona indi kipe yo gutoza muri Saudi Arabia, Jeddah SC, aho azatangira mu mwaka w’imikino wa 2025/2026.
Ku rundi ruhande, abakunzi ba Rayon Sports bavuga ko iki cyemezo kije mu gihe kitari cyiza, kuko ikipe yari isanzwe yugarijwe n’ibibazo by’imari.
Umufana Eraste ati: “Rayon Sports yagombye guhindura imikorere, kuko buri gihe usanga hari imanza z’abakinnyi cyangwa abatoza itabasha kurangiza neza. Ubuyobozi bigomba kwigira ku bihano binyuranye byagiye bibaho bijyanye no kutubahiriza itegeko ry’akazi.”
Ibi bibazo bya Rayon Sports bikomeje kuba imbogamizi mu iterambere ry’iyi kipe y’amateka mu Rwanda, mu gihe abafana bayo bakomeje gusaba ubuyobozi bw’iyi kipe kugira ingamba nshya zo kongera kubaka icyizere no guca mu nzira y’umutuzo.
