Indebakure Webb ya NASA yavumbuye umubumbe mushya ugaragiye Uranus
Uranus yaba ifite undi mubumbe uyigaragiye, uwo mubumbe ukaba ugaragara nk’akadomo gato k’umweru mu mafoto yafashwe n’indebakure James Webb, nk’uko byatangajwe n’abashakashatsi mu by’isanzure mu itangazo rya NASA ryo ku wa 19 Kanama.Uyu akaba ari umubumbe wa 29 umaze kuvumburwa mu mibumbe igaragiye uyu mubumbe munini w’urubura.
Uranus ni umubumbe utangaje cyane, nk’uko bisobanurwa n’umuhanga mu by’isanzure Maryame El Moutamid ukorera muri Southwest Research Institute ikorera muri kaminuza ya Colorado Boulder. Imwe muri iyo mikororombya (anneaux) ni mito cyane, ifite ubugari bwa kilometero nkeya gusa, bigatuma bakeka ko iyo mibumbe ari hafi yayo ishobora kuba ari yo igena ingano yayo.
El Moutamid ni we uyobora umushinga wiga ku mikororombya n’imibumbe mito igaragiye Uranus. Mu kwezi kwa Gashyantare 2025, yasabye indebakure JWST gufata amafoto 10 y’igihe kirekire (longue exposition) ya Uranus mu masaha hafi arindwi.
Amafoto yose yerekanye akantu kameze nk’akazinga katagaragara neza kanyura hafi ya Uranus, inyuma gato y’imikororombya twavuze haruguru.Uko ako kantu kagiye garuka kenshi muri ayo mafoto hamwe n’umuvuduko wako, byerekanye ko ari umubumbe mushya ugaragiye Uranus. El Moutamid n’itsinda rye bemeje ko koko ari byo nyuma yo gusuzuma imibare yose bari begeranije.
Mu magambo ye El Moutamid yagize ati “Byari ubwa mbere mbonyeumubumbe mushya; byanshimishije cyane”
Umubumbe mushya ugaragiye Uranus, ubu witwa S/2025 U1, uherereye ku birometero ibihumbi 56 uvuye mu izingiro rya Uranus kandi ukaba wikaragaho mu nzira izunguruka . El Moutamid n’abo bakorana bibaza ko gifite ubugari bwa kilometero 10, bishingiye ku rugerorw’uko indi mibumbe igaragiye Uranus uko ingana. Abashakashatsi baracyegeranya andi makuru kugira ngo batange ibipimo nyakuri. S/2025 U1 ni umubumbe muto cyane ugereranyije n’indi mibumbe 28 isanzwe igaragiye Uranus,ibi bikaba bisobanura impamvu ibyogajuru nka Voyager 2 bitashoboye kuwufotora kubera ko kamera zitari zifite ubushobozi nk’iz’icyogajuru JWST.
Ubu ikigiye gukurikira, nk’uko El Moutamid abivuga, ni ugusaba ko umuryango mpuzamahanga mu by’isanzure wita izina uyu mubumbe. Izina rizava mu nyandiko za William Shakespeare cyangwa Alexander Pope, nk’uko n’indi mibumbe igaragiye Uranus yiswe. Hari n’indi ishobora kuzavumburwa mu gihe kiri imbere, cyane cyane ubwo NASA izaba yohereje ikindi cyogajuru kizazenguruka Uranus ahagana mu mwaka wa 2030.
