Umujyi wagaragaye munsi y’ikiyaga cya Van ushobora gusobanura byinshi ku nkuru y’umwuzure wa kera

Mu gihugu cya Turikiya, abashakashatsi bavumbuye ibisigazwa by’umujyi w’akataraboneka uri munsi y’ikiyaga cya Van, igikorwa gishobora gutanga urumuri rushya ku nkuru z’imyaka ibihumbi ishize zivuga ku mwuzure udasanzwe washenguye isi.

Uyu mujyi, bivugwa ko waba warubatswe mbere y’imyaka iri hagati ya 12,000 na 14,500 ishize, wabonetse bwa mbere mu 1997 ubwo umukinnyi wa filime w’Umunya-Turikiya, Tosun Saral, yakoraga ubushakashatsi ku binyabuzima byo mu mazi.

Nyuma y’igihe kinini abantu bemeza ko icyegeranyo cy’umwuzure cya Nowa kivugwa muri Bibiliya gishingiye ku myemerere y’iyobokamana, ibi bimenyetso bishya bishobora gutuma abantu bongera gusuzuma niba koko iyo nkuru itaba ifite inkomoko ku byabayeho by’ukuri.

Inyubako, imihanda n’ibimenyetso biranga ubuzima bw’abantu

Mu byo abarobyi n’abashakashatsi babonye, harimo inyubako nini zasaga n’izubatse ku murongo uhamye, imihanda itandukanye, n’ibisigazwa bigaragaza ko abantu bahabaye igihe kirekire.

Abahanga mu mateka n’ibisigaramatongo bavuga ko uwo mujyi ushobora kuba warasibamye n’umwuzure ukomeye wahinduye isura y’akarere kose mbere y’igihe cy’umwuzure wa Nowa uvugwa mu bitabo byera.

Ese umwuzure wa Bibiliya washingiye ku wundi mwuzure wa mbere?

Matt LaCroix, umwe mu bashakashatsi bamenyekanye cyane mu bijyanye n’amateka y’ibihugu bya kera, avuga ko ibyabaye bishobora kuba byaratangiye ubwo ikirunga cya Nemrut cyarukaga, bigatuma amazi y’umugezi wa Mirat agwa mu cyanya cyo hasi, akuzura ikiyaga cya Van maze umujyi wose ushyirwa munsi y’amazi.

Mu kiganiro yagiranye na podcast ya Limitless iyobowe na Matt Beall, LaCroix yavuze ko:

“Mu myaka ibihumbi bitandatu ishize, abantu ntibari bafite ubushobozi bwo kubaka ibintu bihanitse. Ibi bisigazwa bigaragaza ikoranabuhanga rihanitse ry’abantu bo hambere ku buryo byagorana kwemera ko ari iby’igihe cya vuba.”

Abasesenguzi b’amateka basanga bishoboka cyane ko inkuru y’umwuzure wa Nowa yaba yarakuwe mu byabaye by’ukuri muri kariya gace, hanyuma ikandikwa mu buryo bw’iyobokamana kugira ngo isobanure imbaraga z’Imana cyangwa ibihano byayo.

Inkomoko z’amateka zirakomeje kugirwa iperereza

Ibi bivumburwa byashyize igitutu ku nyandiko za Bibiliya n’izindi nyandiko zera, kuko bigaragaza ko hari amateka y’isi atari yarigeze ahabwa agaciro gahagije. Ndetse hari n’abavuga ko inkuru y’umwuzure wa Nowa yaba ishingiye ku nkuru za kera zo muri Mesopotamiya, aho hakomoka inyandiko zashingiweho na Bibiliya n’izindi nyandiko z’idini.

Ni ibintu byatumye abashakashatsi n’abahanga b’iki gihe basaba ko hakorwa ubushakashatsi burambuye kuri ibi bisigazwa, kuko bishobora guhindura burundu uburyo amateka y’abantu n’inkuru z’imico itandukanye byasobanurwaga.