Inama ya Modi na Xi igamije gusubukura umubano w’u Buhinde n’u Bushinwa
Mu mpera z’icyumweru gishize, Minisitiri w’Intebe w’u Buhinde, Narendra Modi, yagiriye uruzinduko mu Bushinwa, ahurira i Tianjin na Perezida Xi Jinping. Ibiganiro byabo byabereye ku ruhande rw’inama y’Ubwiyunge bw’ibihugu bigize Umuryango wa Shanghai (Shanghai Cooperation Organisation), ifatirwamo imyanzuro ku mutekano, ubukungu, n’imibanire ya dipolomasi mu karere ka Aziya n’u Burayi.
Iyi nama ibaye mu gihe umubano w’u Bushinwa n’u Buhinde wari umaze igihe kinini urimo agatotsi, by’umwihariko nyuma y’uko Pakistan — isanzwe ifitanye ubucuti bukomeye n’u Bushinwa — yakiriye ibikoresho bya gisirikare bigezweho birimo indege z’intambara n’ikoranabuhanga ryo kugenzura ibisasu, ibintu u Buhinde butigeze buhakirizwa neza.
Hari kandi ikibazo cy’ubucuruzi hagati y’ibihugu byombi kigera kuri miliyari 99$ mu cyuho cy’izamura ry’imisoro n’ubwikorezi, ndetse n’ubushyamirane bw’ingabo ku mipaka idahuza, irimo agace ka Aksai Chin kagenzurwa n’u Bushinwa ariko u Buhinde bukagashaka, n’akandi ka Arunachal Pradesh, u Buhinde bugenzura u Bushinwa bukavuga ko ari ubutaka bwabwo.
Ibyaganiriweho
Modi na Xi bemeranyije ko ibihugu byombi bigomba gukorera hamwe mu gukemura ibibazo biriho, hagamijwe inyungu rusange z’abaturage barenga miliyari 2,8 babituye. Mu byihutirwa bemeranyijeho harimo gusubukura ingendo z’indege zihuza ibihugu byombi no koroshya uburyo bwo kubona viza.
U Bushinwa bwavuze ko buha agaciro uru ruzinduko rwa Modi, cyane cyane mu gihe umubano hagati y’u Buhinde na Leta Zunze Ubumwe za Amerika ukomeje kuzamo agatotsi kubera politiki z’ubucuruzi n’ikoreshwa rya peteroli ivuye mu Burusiya.
